“Парчами мо рамзи ҳаёти осоишта, ваҳдати ҷовидонаи миллӣ ва умед ба фардои ободи халқи Тоҷикистон аст”
Асосгузори сулҳу ваҳдати миллӣ- Пешвои миллат, муҳтарам Эмомалӣ Раҳмон
Имрӯз, бахшида ба рӯзи Парчами давлатии Ҷумҳурии Тоҷикистон, дар майдони Парчам ва Нишони давлатӣ, ҳамоиши калони тантанавӣ бо иштироки зиёда аз 1000 нафар ҷавонону наврасон, дар даст ливо ва шиору овезаҳое, ки ифодакунандаи соҳибпарчами миллати тоҷикро мекард баргузор гардида, сипас дар толори Кохи фарҳангӣ ноҳия, бо иштироки роҳбарияти ноҳия, Ёрмуҳаммадзода Шермаҳмад, намояндаи Ҳукумати Ҷумҳурии Тоҷикистон, кормандони Вазорати маориф ва илми Ҷумҳурии Тоҷикистон, Лутфуллоев Сайфулло, муовини сардори Раёсати маорифи мақомоти иҷроияи ҳокимияти давлатии вилояти Хатлон, роҳбарон ва кормандони ташкилоту идораҳо, ҷавонону наврасон ва фаъолони ноҳия, маҷлиси тантанавӣ доир гардид. Ҷамъомади тантанавиро бо сухани табрикотӣ Вализода Икромиддин Сироҷиддин, раиси ноҳия кушода иброз доштанд, ки қабули Парчами давлатии Ҷумҳурии Тоҷикистон бо бӯсидан ва ба чашмон молидан, дар зери ливои ҷовидона рӯйи саҳнаи сиёсат омадани Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Ҷаноби Олӣ, муҳтарам Эмомалӣ Раҳмон фоли нек барои мардуми Тоҷикистон гардида, инак дар фазои сулҳу субот ва ваҳдати комил Парчами Ҷумҳурии Тоҷикистон партавафшонӣ менамояд. Ин Парчами зебо мавҷудияти давлатӣ соҳибистиқлоли тоҷиконро тасдиқ карда, дар қатори Конститутсияи Ҷумҳурии Тоҷикистон ва дигар рамзҳои давлатдорӣ демократию ҳуқуқбунёд, дунявию башардӯст ва ҷонибдори сулҳу ҳамкориҳои осоишта будани давлати тоҷиконро ба ҷаҳониён муаррифи намуд. Парчами миллии мо нишона аз таърихи чандинҳазорсолаи халқи тоҷик аст. Тибқи маълумоти сарчашмаҳо қавмҳои ориёӣ ҳанӯз аз давраҳои бостонӣ оини парчамдориро гиромӣ медоштанд. Парчами миллӣ яке аз муқаддасот аст, ки симои миллии давлатро дар сатҳи ҷаҳонӣ таҷассум мекунад. Пос доштан ва ҳимоя кардани Парчами миллӣ ин пос доштан ва ҳимоя кардани Ватан, хонаводаву фарзандони худ ва таъриху суннатҳои халқу кишвари худ аст, қайд намуданд раиси ноҳия.
Ҳамзамон намояндаи Вазорати маориф ва илми Ҷумҳурии Тоҷикистон Ёрмуҳаммадзода Шермаҳмад, дар сухани табрикотии худ иштирокдорон ва дар симои онҳо кулли сокинони ноҳияро бо ин рӯзи фархунда табрику таҳният гуфта, ҷиҳати дар сатҳи баланд ҷашн гирифтани рӯзи Парчами миллӣ дар ноҳияро бо қаноатмандӣ изҳор намуданд. Дар рафти чорабинӣ аз тарафи раиси ноҳия ва меҳмони олиқадр ба иштирокчиёни фаъоли барнома-озмуни интеллектуалии “Шоҳмот”, бахшида ба “Бистсолаи омӯзиш ва рушди фаннҳои табиатшиносӣ, дақиқ ва риёзӣ дар соҳаи илму маориф солҳои 2020-2040” равона гардидааст, бо Сипоснома ва туҳфаҳои молии мақомоти иҷроияи ҳокимияти давлатии ноҳия сарфароз гардиданд. Дар фарҷоми ҷамъомади тантанавӣ, наврасони мактаби мусиқӣ ва санъаткорони бахши фарҳанги ноҳия, бо сурудҳои ватандӯстона иштирокчиёни чорабиниро болидахотир намуданд.
Хадамоти матбуотии раиси ноҳияи Кӯшониён
