Имрӯз, 7 сентябри соли равон бо мақсади иҷрои дастуру супоришҳои Сарфармондеҳи олии Қувваҳои мусаллаҳӣ Ҷумҳурии Тоҷикистон, Президенти мамлакат, муҳтарам Эмомалӣ Раҳмон, бахшида ба ҷашнӣ 30-солагии Истиқлолияти давлатии Ҷумҳурии Тоҷикистон, дар кӯчаи марказии Ҷамоатҳои шаҳраки Исмоили Сомонии ноҳия, бо иштироки роҳбарияти ноҳия, намояндаи Ҳукумати Ҷумҳурии Тоҷикистон, Вазири маориф ва илми Ҷумҳурии Тоҷикистон Имомзода Муҳаммадюсуф Сайдалӣ, намояндагони мақомоти иҷроияи ҳокимияти вилояти Хатлон, ветеранҳои ҷангу меҳнат ва беш аз 3000 нафар кормандони мақомоти ҳифзи ҳуқуқ ва ташкилоту идораҳои ноҳия гузашти низомии захираҳои сафарбарӣ, мудофиаи ҳудудии Қувваҳои мусаллаҳ ва сохторҳои қудратӣ бо сафарбарии нақлиётӣ ҳарбӣ, дар фазои тантанавӣ баргузор гардид. Дар баромади табрикотии худ, раиси ноҳия Вализода Икромиддин Сироҷиддин қайд намуданд, ки имрӯз ҳамаи мо бахшида ба 30-солагии Истиқлолияти давлатии Ҷумҳурии Тоҷикистон барои гузаштан аз паради ҳарбӣ саф оростаем. Артиши миллии мо пас аз соҳибистиқлолии давлатӣ ҷавонамон дар вазъиятӣ ниҳоят мушкили сиёсӣ, дар ҳоле таъсис ёфт, ки ҳеҷ пойгоҳи аввалия ва ё заминаҳои моддию техникӣ ҳарбӣ дар мамлакат вуҷуд надошт,вале дар натиҷаи андешидани ҳамаи тадбирҳои зарурӣ аз ҷониби роҳбарияти давлату Ҳукумати Ҷумҳурии Тоҷикистон зери сиёсати хирадмандонаи Асосгузори сулҳу ваҳдати миллӣ- Пешвои миллат, муҳтарам Эмомалӣ Раҳмон ҳамаи ҷузъу томҳои он дар як муддати начандон тӯлони барои ҳифзи марзу буми аҷдодӣ ва дастовардҳои Истиқлолияти кишварамон омодаи хизмат гардиданд. Дар фарҷоми сухан раиси ноҳия ҳамаи иштирокчиёни гузашти низомиро ба ифтихори ҷашни 30-солагии Истиқлолияти давлатии Ҷумҳурии Тоҷикистон табрик намуда, ба ҳар кадоми онҳо тансиҳативу хонаободӣ, рӯзгори неку осоишта ва ба кишвари маҳбубамон сулҳу суботи оромии ҷовидонӣ таманно намуданд. Ҳамзамон, дар чорабинии идона намояндаи Ҳукумати Ҷумҳурии Тоҷикистон, Вазири маориф ва илми Ҷумҳурии Тоҷикистон Имомзода Муҳаммадюсуф Сайдалӣ баромад намуда, иштирокчиёни чорабиниро ва тамоми сокинони ноҳияро аз номи Ҳукумати Ҷумҳурии Тоҷикистон ба муносибати ҷашнӣ бошукуҳи миллӣ 30-солагии Истиқлолияти давлатии Ҷумҳурии Тоҷикистон табрик намуда, барои дар сатҳи баландӣ ташкилӣ ва сиёсӣ омода намудани гузашти низомиро баҳои баланд доданд.
Дафтари матбуотии раиси ноҳияи Кӯшониён
